Edward Beurne

የኤድዋርድ በርኔ ፕሮፖጋንዳ ማሽን

የፕሮፖጋንዳ አላማ ሰዎችን ማስተማር እና ማንቃት ሳይሆን: ሰዎችን አደንዝዞና አሳስቶ ለህይወታችን ምንም ጠቃሚ ያልሆኑ ነገሮችን: ለይህወታችን እጅግ ጠቃሚና አስፈላጊ እንደሆኑ ነገሮች አድርጎ ማሳመን ነው:: የዚህ እኩይ ጥበብ አባት ተብሎ በስነ ልቦና ትምህርት ጠበብቶች ዘንድ በቀዳሚነት የሚታወቀው ኤድዋርድ በርኔ የሚባለው ሰው ነው:: ሳይኮ አናሊስቱ ኤድዋርድ በርኔ የሌላው በዚህ ሳይንስ ስሙ የገነነውን የሲግመንድ ፍሮይድን ዱካን ተከትሎ የመጣ ብቻ ሳይሆን የስጋ ዘመዱም ነው:: ይህ ኤድዋርድ በርኔ ካቀረባቸው ፅሁፎች አንዱ እና ዋንኛው 'ፕሮፖጋንዳ' የተሰኘው ጽሁፉ ሲሆን: ይህ ጽሁፍ ብዙ ህዝብን በፕሮፖጋንዳ መሳሪያ በመጠቀም ለቢዝነስም ይሆን ለሌላ ለተፈለገ አላማ መጠቀሚያ የሚደረግበትን ጥበብ የሚያስተምር ማኑዋል ወይንም አውደ ነገስት ነው:: በአሁኑ ወቅት የዚህ የኤድዋርድ በርኔ ትምህርት ሸቀጣ ሸቀጥን በሚሸጡ ድርጅቶችና ኮርፖሬሽኖችም እጅ ውስጥ ገብቶ እየተሰራበት ስላለ አብዛኛው የዓለም ህዝብ የኤድዋርድ በርኔ እስትንፋስ ባለባቸው ማስታወቂያዎች እና የሶሻል ሚዲያ ውሸቶች ሳይታወቀው ህሊናውን ስቶ አቅሉን ለቆ በደመ ነፍስ ግዛ የተባለውን ሳያስፈልገው ይገዛል: ደግፍ የተባለውን ሳያውቀው ይደግፋል: : ማስ ኮንዲሽኒንግ ወይንም በጋራ መጃጃል ስለሆነ ትምህርቱ በራስ ማሰብ: የራስን የሰከነ ሃሳብ ማንፀባረቅና ማመንጨት ሳይሆን: ጎራ እየለዩ በመሃበር ተደራጅቶ በሸለቆ ውስጥ የድንቁርና እንጨት እያነደድን ቁጭ ብለን እንሟሟቅ ይመስላል ምርጫችን:: አሁን አሁን ይህ የኤድዋርድ በርኔ መርዝ ወደ ሃገራችን ወደ ኢትዮጵያም ሰተት ብሎ መግባቱን እና በኢትዮጵያም ያሉ ድርጅቶችና ግለሰቦችም ህዝቡን በቁም እንቅልፍ ለመንዳትና ኪሱንም ለማራገፍ ሲጠቀሙበት ሳይ 'ወይ ጉድ' ያሰኘኛል:: በድርጅቶቻቸው ውስጥ ተቀጣሪ የሆነ ፈረንጅ ሰራተኛ የሌላቸው የግል ድርጅቶች በማስታወቂያቸው ከመንገድ ዝም ብለው የለቀሙትን ፈረንጅ 'የኛ ሰራተኛ ነው' ብለው በቴሌቪዥን ማስታወቂያቸው ውስጥ ከተውት የሚያሳዩን ዘመን ላይ ደርሰናል:: እነርሱ የኤድዋርድ በርኔን የፕሮፖጋንዳ ማሽን ትምህርትን የተረዱበት የአእምሮ ጥግ አበሻ ፈረንጅን ያመልካል የሚል ድረስ ነዉ:: በጣም ያሳዝናል:: ይዘገንናልም::

እገሌን ለማግነን: የድርጅትን ስም ከፍ ለማድረግ እና 'ይሄ እውነት ነው ' ለማለት ፈረንጅ ስናሳይ: የፈረንጅ ጋዜጣ እንዲህ አለ: የፈረንጅ ቲቪና ሬድዮ እንዲህ አለ እያልን: ባይልም እንኳ ነው ብለን ሽምጥጥ አድርገን መዋሸትን የምናቆመው መቼ ይሆን:: በፈረንጅ ምስክርነት ሳይሆን በራሳችን ምስክርነት ተማምነን እና ተከባብረን የምንኖረው መቼ ነው:: ያ ቀን በእውነት ናፈቀኝ:: ፈረንጆች ስለ እነርሱ የእኛን ምስክርነት እንደው ጠይቀውን አያውቁ:: እኛ ታዲይ እንዲህ 'ጌቶች እንዳሉት' በሚል አይነት የምንርመጠመጠው ምን ሆነን ነው:: ሊታሰብበት ይገባል:: ወስብሃት ለእግዚአብሔር!!!

#ኤሶፕ ኢትዮጵያ

 

 

 

ይከተሉን!